Moldova-ah European Summit neih a ni

Moldova-ah nimin khan European Summit neih a ni a, Ukraine war leh tualchhung buaina hrang hrang thleng mek chungchangte chu sawiho.

European Political Community (EPC) summit-ah hian Europe ram hruaitu 50 vel an tel a, Ukraine president Volodymyr Zelenskyy pawh a tel.

Moldova president Maia Sandu chuan summit chu Russia-in a run mek, Ukraine ram an thlawpna lantirna atana a pawimawh thu sawiin, Ukraine chuan tun thlengin Moldova ram chu a hum a, a chungah an lawm hle tih a sawi bawk. Moldova ram hian Ukraine ang bawkin nikum khan EU zawm a dil ve bawk a ni. Ukraine leh Russia ram indona thleng mekah, Ukraine a thlawpna pawh a lo lantir fo a, Ukraine aṭang hian raltlan pawh eng emaw zat an lut a ni.

Summit-ah hian Germany chancellor Olaf Scholz, France president Emmanuel Macron leh UK prime minister Rishi Sunak-te pawh an tel.