NKorea-in spy satellite kahchhuah leh thuai tiam

North Korea ram hotu lu ber, Kim Jong-un-a farnu, Kim Yo Jong chuan Nilainia an ramin spy satellite a kahchhuah chesual a, tuipui a tlak hnuah spy satellite dang an kahchhuah leh thuai tur thu a sawi.

NKorea hian US sipaite chetvel dan thlithlaina turin spy satellite hi a kapchhuak a, mahse hlawhtling loin tuipuiah a tla tih an sawi leh nghal a ni. He thil thlen hnuah NKorea sorkar thupuangtu, Kim Yo Jong chuan an bei nawn leh thuai dawn tih a sawi zui nghal a ni.

Nilainia satellite phurtu rocket, Chollima-1 rocket kahchhuah a nih lai leh, a hnuah a alh zui lai thlalakte pawh NKorea hian an pholang a ni.

US, South Korea leh Japan chuan rocket kahchhuah hi na takin an sawisel nghal a, UN resolution bawhchhiatna a nih thu an tarlang. Mahse Kim Yo Jong chuan chhang letin, anmahni dinhmuna nena inkalh a ni tiin, US bakah a thawhpui ram dangte chuan vawi sang tel satellite an kapchhuak tawh a ni, a ti. "US chu gangster group a ni. NKorea hian balloon hmangin orbit-ah satellite kapchhuak pawh ni se, dan kalh leh ram dang tana hlauhawm a ni tiin a sawi tho ang," tiin US chu a bei zui.