Senegal-a buaina chhuakah mi 9 an thi; Sorkarin social media platform hman a khap

Senengal-a eptu hruaitu, Ousmane Sonko thlawptute leh police-te inkara buaina chhuakah mi pakua an thi tih nimina sorkar thuchhuak chuan a tarlang. Buaina chhuah hnu hian sokar chuan social media platform hrang hrang hman khapna thupek a tichhuak nghal bawk.

Eptu hruaitu Sonko hi Ningani khan mipat hmeichhiat kaihhnawihah mawi lo taka che puhna thubuaiah thiam loh chantir a ni a, kum hnih tang tura hrem a ni. A thubuai dang, hmeichhia pawngsuala puhnaah erawh chuan thiam a chang thung.

Court-in hremna a tihchhuah hnu hian hmun hrang hrangah Sonko thlawptute chuanglungawi lohna lantirin, police-te nen an intibuai zui a ni.

Interior minister Antoine Felix Abdoulaye Diome chuan thuchhuah siamin, tualthihna thlenna hmun hi Senegal khawpui Dakar leh , Sonko mayor a nihna Ziguinchor-ah te a nih thu a tarlang. Social media hrang hrang, Facebook, WhatsApp leh Twitter-te chu lungawi loten tharum thawh tura midangte fuihna hmanruaah an hman avangin tihtawp nghal a ni tih a sawi bawk. "Senegal sorkar chuan mipui leh an thil neihte himna turin theihtawp a chhuah a, ram chhung hmun tinah security pawh tihchak a ni ang," tiin Diome chuan a sawi.

Sonko hi Ningania Court-a a chungthu ngaihtuah lai hian a inlan duh lo a, a awm lo chungin court chuan thutlukna hi a siam a ni. Sonko-a ukil chuan, Sonko manna tur warrant hi police-ten an la ti chhuak lo niin a tarlang.

Kum 2019-a Senegal president inthlanah khan Sonko hi pathumna a ni a, ṭhalaite zingah a tla na hle a, president Macky Sall khingthla thei tura beisei ber a ni. Amah thlawptute chuan an puhna hi kum 2024 President inthlan lo awm tura a in candidate theih lohna tura sorkarin hma a lakna niin an puh.

Senegal dan hnuaiah hian ṭhalai hruai dik lo a, an thuneihna hmang suala kum 21 hnuailamte mipat hmeichhiatna hmanpui hi hrem theih a ni a, kum nga thleng tantir bakah dollar 6000 chawi tir theihn a ni bawk. Sonko ukil chuan thiam loh chantir a nih avangin kum 2024 inthlanah pawh a chuh thei dawn lo niin a sawi bawk.

A chungthu ngaihtuah laia Court-a a inlan duh loh avangin Sonko hian hremna pek hi a appeal thei dawn lo. Mahse jail a luh hnuah 'retrial' a dil phalsak a ni ang. Sonko-a hi jail-a dah luh hun tur hriat a ni lo.