Japan rama nau piang zat tlakhniam ber kum thleng

Japan rama nau piang zat chu a zawnin kum sarih chhung a tlahniam tawh a, kum 2022 kha a tlakhniam ber ṭum a nih thu nimina health ministry thuchhuah chuan a tarlang.

Japan ramah hian hmeichhiain nau a neih theih hun laia fa a hrin zat, fertility rate hi nikum khan 1.25 niin, kum 2005 khan 1.26 a ni. Hetih lai hian mipui ral zel tur venna atan chuan fertiliy rate hi 2.07 a ngai nia chhut a ni.

Prime minister Fumio Kishida chuan an rama birth rate tlahniam zel siamṭhat chu a kaihhruai sorkarin a ngaih pawimawh ber a ni tih a sawi tawh. Leiba tam tak nei mah se, nau piang an pun theihna atan naupang enkawlna kawnga nu leh pate puihna turin kum khat atan USD tld 25 an ruahman a ni. PM chuan, "Hetiang dinhmun kan tawn zel chuan, kum 2030 chhoah ṭhalai awmzat hi a tlahniam tawh dawn a, thlak danglam turin hemi thleng hi hun kan la nei a ni," a ti.

Nikum chhung khan Japan ramah naupiang 7,70,747 awmin, kum hmasa aiin 5% in an tlem. Hetih lai hian thi zat hi maktaduai 1.57 awmin, 9% in an pung thung. Nikuma Japan rama thi zinga 47,000 chuang chu coronavirus vanga thi an ni.