Bangladesh-a thlipui tuarte ṭanpuina tur UN in pechhuak

United Nations chuan tun hnaia Bangladesh chhimchhak lama cyclone Mocha tleh tuartu, Roghingya raltlante ṭanpui leh chhawmdawlna turin USD mtd 3 a pe.

UN emergency relief coordinator, UN undersecretary-general ni bawk, Martin Griffiths chuan Central Emergency Response Fund aṭangin ṭanpuina hi a pechhuak a ni.

Cyclone Mocha tleh khan Bangladesh-a Rohingya raltlante awmna, refugee camp-a chenna in eng emaw ata tichhia a ni. He thlipui tleh hi Myanmar ram chuan a tuar nasa zawk a, chenna in tam tak a chhiat bakah nunna chan pawh eng emaw zat an awm bawk.

UN secretary-general Antonio Guterres-a thupuangtu, Stephane Dujarric chuan emergency fund pek hmang hian thlipuiin an chenna hmun a tichhiatsakte awmna tur siam leh, infrastructure dang a tihchhiatte pawh siamṭhat a nih tur thu a sawi. Hei bakah hian chhawmdawlnate pawh pek an ni ang, a ti.

Dujarric chuan fund indaih loh avanga Rohingya raltlante chhawmdawlna pek ṭhin tihtlem a nih tawh thu pawh a sawi bawk. World Food Programme (WFP) chuan sum an neih loh vangin Rohingya raltlante chhawmdawlna, thla khata USD 10 hu a pek ṭhin chu USD 8-ah a titlem leh a,hei hi thla thum chhunga ration a tihtlem vawi hnihna a ni tawh. A hmaa a lo pek ṭhin, thla khata mi pakhat tana USD 12 hu zel pe leh turin, WFP hian USD mtd 50 vel a mamawh dawn a ni.