Pakistan ramah thil man tona 37.97% a tling

Sum lama harsatna tawh mek leh, politics vanga buaina chhuah fona, Pakistan ram chuan harsatna dang a tawh belh zel. May thla chhunga an rama thil man tona chu nikum May thla nena khaikhinin 37.97% a tling. South Asia-a thil man to chakna ber ram a ni a, an hnuaiah Sri Lanka awmin, kum khat chhunga thil man sanna hi 25.2% a ni.

Bureau of Statistics-in nimina data a tihchhuaha a landanin, zu lam leh vaihlo lam chu kum khat chhunga to chak ber niin, a sanna hi 123.96% an tling. Recreation leh culture lamin dawtin 72.17% in a to belh a, transport lam sanna pawh 52.92% a tling bawk. Ei tur lam pawh 50% in an to belh tawh bawk.

Ei tur zingah alu, chhangphut, thingpuife, wheat, artui leh buhfai mante chu kum khat chhunga to belh zualte an ni. Non-food category zingah a man pung zualte chu textbook, stationery, motor fuel, inbualna sahbawn, insukhlo leh nawlhalhte an ni. Thil man pung zel hian mi rethei leh middle-class chhungkuate a nghawng na zual a ni.