Israel-ah judicial system siamṭhat tum duh lohna lantir leh

Israel prime minister Benjamin Netanyahu-a kaihhruai in an ram judicial system siamṭhat a tum duh lohna lantirin, Inrinni liam ta khan Tel Aviv leh khawpui dangahte rally buatsaih a ni leh. Hei hi kartawpa rally ṭum 22 an huaihawtna a ni tawh.

Judicial system siamṭhat tumna duh lohna lantira mipuite nawrh an huaihawt hnuah, Israel sorkar chuan March thla khan chawlhsan rih a nih thu sawi mah se, nawrh hi an la huaihawt chhunzawm reng tho a ni.

Inrinni liam taa Tel Aviv khawpuia nawrh huaihawtah hian mi nuai khat chuang an pungkhawm a, meichherte kengin Israel flag an vai a, khuang nen thawm ring tak an chhuah a ni. Pungkhawmte chuan sorkarin a hmalakna chu chawlhsan rih mah se, a sut vek hma chuan duh lohna lantir chhunzawm zel an tum tih an sawi.

Israel sorkarin judicial system siamṭhatna tura ruahmanna a siamah hian, Supreme Court thuneihna chu tihnep sak a ni a, Parliament chu thuneihna sang zawk pek tum a ni. Mahse eptu lam chuan he ruahmanna hi civil rights tan a him dawn lo niin an ngai a ni.

Rally neih hma ni, Zirtawp ni liam ta khan Tel Aviv-a PM Netanyahu private residence pawnah mi tam takin lungawi lohna an lantir bawk a, pungkhawm zinga mi 17 vel chu man an ni.