Khawvela spy chief-te a rukin Singapore-ah inhmukhawm

Khawvela intelligence agency lian hranga hrang 20 chuang aiawhte chu Shangri-La Dialogue security meeting neih pahin Singapore ah kar kal ta khan a rukin an inhmukhawm.

Hetiang meeting hi Singapore sorkar chuan khawpui hmun hrang hrangah kum tak tak a lo huaihawt tawh ṭhin a ni.

US aiawhin National Intelligence Director Avril Haine a kal a, superpower ram pahnihte inkara boruak rit tak awm karah China ram aiawh pawh inhmuhkhawmnaah hian a kal a ni. India rama aiawhin Research and Analysis Wing hotu, Samant Goel a tel. Meeting-a tel zinga pakhat chuan, hetiang inhmuh khawm hi ram hrang hrang tana a pawimawh thu te, ram leh ram inhriatthiam tawnnan a ṭul thute a sawi. Meeting-ah hian Russia leh Ukraine indo chungchang te leh ram leh ram inkara pawikhawihna thleng ṭhinte sawi ho a nih thu a sawi bawk.

Meeting-ah hian Russia aiawh a tel lo a; Ukraine deputy defence minister, Volodymr V. Havrylov pawh Shangri-La Dialogue-ah tel mah se intelligence ho inhmuhkhawmnaah hian a tel lo.

Singapore Ministry of Defence thupuangtu chuan intelligence agency-ten ram dang agency-te hmuhna remchangah Shangri-La Dialogue hi an hmang tih a sawi a, hetiang meeting hi a telten hlawkthlak an ti hle ṭhin tih a sawi.

Sangri-La Dialogue-ah hian ram hrang hrang 49 aṭanga palai 600 chuangten ni thum chhung session a nei a, hemi pah hian Sangri-La Hotel hmun hrang hrangah bilateral leh multilateral meeting neih ṭhin a ni.