Ecuador-ah tuilian vangin mi 500 chuang sawn chhuak

Ecuador hmar lamah Pathianni khan ruah sur nasa tak avangin tui a lian a, mi 500 chuang chu hmun him lamah sawn chhuah an ni tih President Guillermo Lasso chuan a sawi.

President Lasso chuan darkar 12 chhung chawl loa ruah nasa taka a sur avangin lui paruk a lian tih a sawi. Hei vang hian tuilianin a tihbuaite hi an chenna in aṭangin hruai chhuah an ni a, harsatna tawk dangte chhanchhuah hna pawh thawh chhunzawm mek a nih thu a sawi bawk.

Risk Managment Secretariat chuan tuilianin a tihbuaite hi lawng leh helicopter hmanga hruai chhuah an ni tih a sawi a, khaw eng emaw zatah school pawh khar a ni tih a sawi.

Kumin January leh May thla inkarah ruah sur nasa vanga chhiatna thlengah Ecuador-ah hian mi 36 in nunna an chan tawh a, mi 99,000 velin harsatna an tawk bawk a ni. March thla khan Andean khuaah leiminin in tam tak a hnawl a, mi 60 vel an thi bawk. Leiminin a chhilh zingah ruang 13 chu tun thlengin hmuh an la ni lo a, zawn mek an la ni.