Russia-in Ukraine-a dam pawimawh kap chhia

Ukraine chuan an ram chhim lama dam lian, Soviet Union hunlaia siam, Nova Kakhova dam chu Russia-in a kapchhia niin a sawi a, hei vang hian indona bial chhung chu tuilian hian a tibuai zui a ni.

Kherson biala dam hi meter 30-a sang leh km 3.2-a thui a ni a, kum 1956-a Kakhovka hydroelectric power plant an siam ṭuma Dnipro luia an siam a ni. He hmun aṭang hian kum 2014-a Russia-in a luahsak tak, Crimean peninsula leh Zaporizhzhia nuclear plant-ah tui supply a ni ṭhin.

International Atomic Energy Agency (IAEA) chuan dam chhia vang hian nuclear plant lamah hlauhthawnna a awm lo tih a sawi a, mahse thil awm dan erawh an thlithlai reng thu a sawi. Zaporizhzhia nuclear plant hotu pawhin hlauhthawn tur a awm lo tih a sawi ve bawk.

Ukraine president Volodymyr Zelensky chuan Kakhovka hydroelectric power plant dam an kah chhiatsak aṭang hian, khawvel pum chuan Russia chu Ukraine aṭanga hnawhchhuah a ṭulzia an hre chiang dawn a ni, a ti.

Dam tihchhiat a nih vang hian Dnipro lui bula hmun pariat chu tuilianin a tibuai a, mi 16,000 vel chu dinhmun hlauhawm takah an awm mek niin Kherson-a Ukraine sipai hotu Oleksandr Prokudin chuan a sawi. President Zelenskyy pawhin dam beih a nih vang hian national security council chu emergency meeting a neihpui nghal bawk.

Hetih lai hian Kherson-a Russia official-te hian dam hi Ukraine lam tihchhiat a nih thu an sawi thung. Ukraine lam hian vawi tam tak an kah hnuah, Thawhṭanni zanlai thlen hma hretin a kap chhia a, hydroelectric power station-a hydraulic valve pawh an kap chhia a, dam tak erawh a chhe tel lo niin an sawi.