Jail aṭangin Pakistan Foreign Minister hlui Qureshi chhuah a ni

Pakistan Foreign Minister hlui, Pakistan Tehreek-e-Insaf (PTI) Vice Chairman, Shah Mahmood Qureshi chu Thawhlehni khan Rawalpindi jail aṭangin chhuah a ni.

May ni 9-a PTI hotu lu ber leh Pakistan Prime Minister hlui, Imran Khan man a nih avanga PTI worker-te'n buaina an chawh chhuah kaihhnawihah party hruaitu eng emaw zat man an ni a, an zingah Qureshi pawh hi telin Rawalpindi-a Adiala Jail-ah dah a ni. Man a nih hnuah Qureshi hi thubuai pakua siamsak a ni bawk. PM hlui Khan hi thubuai 100 chuang zet siamsak a ni tawh bawk a, heng zingah hian firfiak zawnga chea puhna pawh a tel.

Lahore High Court-a Rawalpindi bench-in jail aṭanga chhuah tura a tih hnuah, Thawhlehni khan chhuah a ni ta a ni. Jail aṭanga chhuah a nih hnuah Qureshi hi nimin khan Lahore-ah PTI chief, Imran Khan-a chennaah kalin, meeting an nei dun nghal a ni.

Kum 66 mi, Qureshi man a nih hnuah, May ni 18 khan Islamabad High Court chuan chhuah turin a lo ti tawh a, mahse tihkhawtlaisak a ni. Hemi hnu hian Lahore High Court chuan chhuah turin thupek a rawn tichhuak ve leh a ni.

Jail aṭanga chhuah a nih hnu PTI worker-te hmaa thu a sawinaah, Qureshi chuan hun khirh tak an tawk mek a, mahse, beidawng lo tur leh, an tana khua a var thuai tur thu a sawi. Jail-ah pawh pawi sawi lo tam tak hren mek an la ni a, a legal team-te biain heng mite pawh hi chhuah zalen an nih theihna atan a bei dawn tih a sawi bawk.

May ni 9-a Pakistan ram chhung hmun hrang hranga buaina chhuak kaihhnawihah hian PTI worker 10,000 chuang man an ni tawh a, an zinga mi 4,000 chu Punjab province-a mi an ni. Punjab province-ah chuan home department-in tharum thawhna thlen leh sorkar hmun pawimawh beih a nih chungchang chhuitu tur hi joint investigation team 10 a din a ni.