Canada ram kangin North America boruak a tichhia

Canada-a ram kang nasa tak vangin North America chu meikhuin a bawh nasa a, boruak a tichhe nasa hle. Mipuite chu pawn an chhuahin N95 mask hmang tura thurawn pek an ni.

Canada sorkar chuan an ram mipuite chu a theih anga pawn chhuak lo turin a chah a, an chhuak a nih pawhin face mask hmang zel turin a ti. Health official-te chuan pawn lama insawizawi, exercise la rih lo turin mipuite an ngen bawk.

Quebec province chu ram kang thlenna nasa ber niin hmun 150 velah a kang mek a, mi 15,000 vel chu insawn chhuak tura tih an ni.

New York boruak ram kang khuin a bawh nasa a, hei vang hian nimin aṭang mipuite hnenah face mask sem chhuah a ni a, Governor Kathy Hochul chuan face mask hi maktaduai khat vel an sem dawn tih a sawi. Air quality chhe lutuk vangin New York leh Philadelphia-ah major league baseball games neih tur pawh ṭhulh a ni bawk.

Washington DC-ah Nilaini khan air quality chhe lutuk avangin school an khar a, Detroit khawpuiah pawh Nilaini khan IQAir air pollution ranking- ah metropolitan area-ah boruak chhiat lamah pangana a rawn ni phak bawk.

Canadian National Fire Database-in a tarlan danin, ram hectare mtd 3.8 velah kangmei hi a chhuak tawh a, kum 10 chhunga tun ang huna ram kang thlenna ṭhin aiin a let 12-a zau a kang tawh a ni. Ram kang ṭhelh hnathawhnaa pui turin US chuan kangṭhelhtu 600 chuang Canada ramah hian a tir tawh.

Province zawng zawng deuh thawah ram hi a kang a, official-te chuan an ram dinhmun an thlirin August thla thleng pawhin ram kang hi a la awm zel a hlauhthawnawm thu an sawi. Hmun 413-ah ram hi a la kang mek a, heng zinga hmun 100 chuang chu thunun theih lohin an awm a ni.

Canada ramah hian May - September thla chhungin ram kang hi a thleng fo a ni. Ram a kan nasat ber chu kum 2014 kha niin, hemi kum hian ram acre mtd 11.3 dawna zau a kang.