UNSC-in non-permanent member thar 5 nei

United Nations Security Council (UNSC) non-permanent member atan ram panga thlan an ni.

Nakkum January thla aṭanga kum hnih chhung atana UNSC zawm tur ramte chu - Algeria, Guyana, Republic of Korea, Sierre Leone leh Slovenia-te an ni.

UNSC-ah hian member ram 15 an awm a, heng zinga ram panga - China, France, Russia, UK leh US te chu permanent member niin, veto power an nei. Member dang 10-te chu non-permanent member niin, UN member ram 193-te telna, General Assembly in an thlang ṭhin a, member awm theih dan hi a ram bung mila siam a ni.

Non-permanent member hi secret ballot hmanga thlan niin, chuhtu dang an awm lo a nih loh chuan, member ni thei tur hian vote awm zat aṭanga hmun thuma ṭhena hmun hnih; vote 128 an hmuh phak a ngai.

Tun ṭuma member thar thlannaah hian African and Asia Pacific tan seat pathum, Eastern Europe leh Latin America and the Carribean tan seat pakhat ve ve dah a ni. Eastern Europe group aṭangin Slovenia chuan Belarus hnehin, non-permanent member atan thlan a ni. Hetih lai hian Algeria, Guyana, Sierra Leone leh Republic of Korea-te erawh chu chuhtu dang awm loin an tling thung.

Member thlan ram pangate hian UNSC-a non-permanent member ni mek - Ecuador, Japan, Malta, Mozambique leh Switzerland-te an zawm ang.