Pakistan PM hlui Imran Khan bail dilna phalsak

Islamabad High Court chuan Ningani khan Pakistan Prime Minsiter hlui, Imran Khan-a'n tualthah thubuaia bail a dilna chu a phalsak a, ni 14 chhung chu he thubuai kaihhnawihah hian man theih a ni lo ang.

Imran Khan hi a party, Pakistan Tehreek-e-Insaf (PTI) worker-te'n buaina nasa tak an chawhchhuah avangin May ni 9 khan man a ni a, mahse, tunah hian bail-in a chhuak mek a, criminal case erawh eng emaw zat a nei.

Nilaini khan tualthah thubuai hi siamsak thar leh a ni a, police-te chuan Imran Khan hi sorkar laka hela puhna thubuai siamsak tura phuttu lawyer thah a nih kaihhnawihah he thubuai hi an siamsak a ni. Lahore aṭangin Islamabad-ah kalin bail dilna hi a theh lut a, he thubuai bakah a hmaa thubuai an lo siamsak danga bail a dilna pawh pawmsak a nih thu a lawyer, Naeem Haider chuan a sawi.

PTI aṭanga chhuakte'n party thar an din

Pakistan PM hlui, Imran Khan-a party, PTI aṭanga chhuak an hruaitu hluite chuan political party thar an din.

Imran Khan leh a party-in buaina hrang hrang an tawh hnuah, an party hruaitu eng emaw zat chuan an chhuahsan tawh a ni. Ningani khan lungawi loa chhuakte hian party thar, Istehkam-e-Pakistan Party (IPP) an din tih an puang.

Lahore-a news conference an neihah, kum 2018-a Imran Khan kaihhruai sorkar a din theihna tura mi pawimawh tak, Tareen chuan IPP an din thu hi a puang a ni. Tareen chuan an ramin harsatna nasa tak a tawh mek laka khaichhuak turin hma an la tih a sawi a, an ram chuan economy mai bakah, khawtlang leh thil danga buaina an neih mekte ching fel thei, political leader ṭha a mamawh a ni, a ti. Tareen hi PTI legislator leh worker 100 chuangin an zui nghal.