Australia chanchinbu-in kum 200 dawn liam taa an thu chhuah vangin ngaihdam dil

Australia rama chanchinbu chhiar hlawh ber, Sydney Morning Herald chuan kum 1838-a an ram leilung fate beia thattu, an ram luahtute thi tura hremna pe lo tur zawnga ngensakna article an lo tihchhuah avangin, nimina an chanchinbu chhuak editorial-ah ngaihdam an dil.

Kum 1838, June ni 10 khan ram leilungh fa 28-te chu rawng taka thah niin, hei hi Myall Creek massacre tia sawi a ni. Hemi ṭum hian colonist-te chuan hmeichhia, naupang leh mipa kum upa zawkte chu ngunhnam hmangin a ṭhen an that a, ṭhenkhat chu sorkarin an khen hlumtir bawk. A hnuah an ruangte hi hal a ni a, hmeichhe pakhat chu ni eng emaw zat an pawngsual zui bawk.

Pawikhawihtute lakah hian criminal charge siam a ni a, mahse, he thil thleng chungchangah hian hetih laia Sydney Morning Herald-a article pakhat tihchhuahah chuan, pawikhawihtute hi thiam loh chantir an nih pawhin, thi tura hremna pe lo tura ngensakna an ziak a ni.

Nimina an chanchinbua editorial-ah hian, kum 200 dawn liam taa an article tihchhuah chu an lo tisual hle tih sawiin, ngaihdam an dil a ni.