Document pawimawh khawih chingpenah Donald Trump puh

US President hlui Donald Trump chu classified document khawih chingpenah puh a ni a, US President ni tawh zingah sorkarin cirminal case a siamsak hmasak ber a ni.

President hlui hi an puhnaah thiam loh chantir a nih chuan jail pawh tantir theih a ni ang.

Justice department lam chuan Trump an puhna chungchang hi an la puangzar lo a, mahse, hemi chungchang buaipuitu mi pahnih chuan an hming tarlang loin, Trump hi document pawimawh khawih chingpen chungchangah thubuai pasarih siamsak a ni tih an sawi. Heng document-te hi nikum khan Florida-a Mar-a-Lago resort-ah hmuh an ni a, national security information pawimawhte pawh a tel.

Nikum August thla khan FBI chuan Mar-a-Lago resort aṭang hian document 11,000 chuang an hmu a, kum 2022 January thla khan National Archives-ah classified document 20 dawn awmna, bawm 15 chuang a pe lut bawk.

Social media platform, Truth Social-ah chuan Trump hian tih dik loh engmah a neih loh thu a sawi a, President Joe Biden-a kaihhruai sorkar chu dik lo taka thiltiah a puh let thung.

Kum 76 mi, Trump hian financial crime eng emaw zat tia puh a ni tawh bawk a, heng zingah hian Trump nena inkawp nia insawi, adult film star hnenah a ka hupna atana pawisa pea puhna pawh a tel. Criminal trial hi nakkum March thlaah neih a ni ang.