Bangladesh-ah Rohingya raltlante'n nawrh huaihawt

Bangladesh-a Rohingya raltlante chuan Myanmar rama thawn kir phutin, kar liam ta khan nawrh an huaihawt.

Myanmar ram aṭanga tlanchhia, Rohingya raltlan maktaduai khat chuang chu Bangladesh chhimchhak lam, Cox Bazar-a refugee camp-ah an khawsa mek a ni. An awmna hmun hi a hrehawmin, enkawlna an dawn ṭhat loh avangin Myanmar rama kir leh an duh tih an sawi.

Nawrh huaihawtte chuan Myanmar rama an kir leh thuai theihna atan an nihna finfiah leh interview-te buatsaih kher tawh loin, UNHCR data card hmanga rang taka an kir leh thuai an duh thu an sawi.

Refugee camp-a awm zingah mi ṭhenkhat chuan lawng hmangin Malaysia leh Indonesia-te an lo pan tawh a, tuipuiah thui tak kalin an nunna thapin an kal a ni. UN data chuan nikum chhung khan tuipuia chet sualna thlengah Rohingya mi 348 an thi tih a tarlang.

Bangladesh leh Myanmar thuneitute chuan Rohingya raltlante thawn kir an nih dan tur chungchangah inremna an siam tawh a, kum 2018 leh 2019-ah khan raltlante hi thawn kir tum ni mah se, an zingah kir duh an awm lo a ni. He programme hnuaiah hian pilot scheme raltlan 1,100 chu thawn kir an ni dawn tih Bangladesh official chuan a sawi leh a, mahse a hun tur erawh an la ruat fel lo.

UN refugee agency (UNHCR) chuan raltlante chu an duh phawt chuan an rama kir leh turin dikna an nei vek tih a sawi a, mahse, tihluihna awm loin mahni duhthu ngei a ni tur a ni, a ti. Hetih lai hian Myanmar-a sipai sorkar erawh chuan raltlante lak kir chungchang hi a ngai pawimawh tawk lo nia sawi a ni. Myanmar hian Rohingya-te hi a khua leh tui angin a chhiar tel lo a ni.

Cox Bazar-a refugee camp hi an tawt hle a, hei bakah international aid agency-te'n chhawmdawlna an pek ṭhinte an titlem chhoh tawh a, hei vang hian an dinhmun a harsa zual a, khawtual mite lawm an hlawh loh chhoh tial tial avangin Myanmar rama kir leh hi an duh ta hlawm a ni. World Food Programme chuan raltlante chhawmdawlna, thla tina USD 10 hu a pek ṭhin chu USD 8 hu-ah a tihniam tawh a ni.