Amazon-a May 1-a naupang bo 4 hmuh an ni

Colombia ram chhung, Amazon ramngawa May ni 1-a thlawhtheihna te chi tlaa chuang, naupang pali bote chu an ram huna kar liam ta Zirtawpni khan dam taka hmuh an ni.

Thlawhtheihna te chi tla hi Cessna 206 tih niin, Amazonas province- a Araracuara atangin San Jose del Guaviare lam pana a thlawh laiin, a engine chhe thut avangin a tla niin an sawi. Thlawhtheihnaa chuang zingah naupangte nu leh puitling pakhat telin, anni pahnih leh pilot hi thlawhtheihna tlakna hmunah hian an boral a ni. Naupang pali, kum 13, kum 9, kum 4 leh naute, thla 12 mite chu an dam niin hriat a ni a, mahse, hun rei tak an chin hriat lohin an awm. Colombia sorkar chuan sipai 160 bakah helai ramhnuaia cheng mi 70 te nen naupang bote zawn hna hi 'Operation Hope' hming phuahin a nei.

Naupang bote zawn hna hi helicopter leh sipai thlawhtheihnate, uisa thiam hmanga neih a ni bawk. Naupangte hnu an hmuh aṭangin an kal sawn ve zel tih an hre thei a, ni 40 zet an zawn hnuah thlawhtheihna tlakna hmun aṭanga khawthlang lam, km 5-a hlaah heng naupangte hi dam takin an hmu leh ta a ni.

Colombia president Gustavo Pedro chuan naupangte dam taka hmuh leh an nih thu hi sawiin a tweet nghal a,"Colombia tana lawmna a ni. Colombia ramhnuaia ni 40 chhung bo tawh naupang palite kan hmu leh ta,"a ti.