Pakistan-ah ruah sur nasa avangin mi 25 an thi

Pakistan hmarthlang lam biala ruah sur nasa takin chhiatna a thlenah mi 25 an thi a, mi dang 145 in hliam an tuar.

Senior rescue officer Khateer Ahmed chuan Khyber Pakhtunkhwa province-a Bannu, Lakki Marwat leh Karak district-ahte ruah leh rial nasa taka thawkin, chenna in tam tak a chhia a, thingkungte pawh an tlu tih a sawi. Thingkung tlute hian electrical transmission tower-te an delh chhiat avangin power supply lamah pawh harsatna an tawk a ni.

Harsatna tawkte chhanchhuah leh chhawmdawl hna thawh mek a nih thu Ahmed chuan a sawi. Thla hmasa khan vur tawlh vangin mi 10 chuang an lo thi tawh bawk.

Nikum khan Pakistan ramah ruah sur nasa leh tuilian avangin mi 1,700 chuang an thi a, mi maktaduai 33 vel nghawngin, mi maktaduai 8 dawn chu hmun him lamah an insawn chhuak bawk. Tuilian hian a vanglai tak chuan Pakistan ram hmun thuma ṭhena hmun khat vel a chim niin UN Secretary General Antonio Guterres chuan a sawi a ni.

Prime Minister Shahbaz Sharif chuan chhiatna thlenga thi chhungte a tawrhpui thu sawiin, harsatna tawkte chhawmdawl hna chu chak taka thawk turin thuneitute a hrilh.