Sudan-ah inkahhai a tawp hnuin sipai pawl pahnihte inbei leh nghal

Sudan-a thuneihna inchuha indo mek, Sudan Army leh paramilitary Rapid Support Force (RSF)-te chuan inkahhai puanga inremna an siam a tawp rualin, nimin zing aṭang khan an inbei chhunzawm leh nghal.

Sipai pawl pahnihte'n inkahhai an puan chu nimin zing dar 6 khan a tawp a, hemi rual hian an ram khawpui Khartoum bakah khawpui dangahte an inkap zui leh nghal a ni.

April ni 15 aṭang khan sipai pawl pahnihte hi an rama thuneihna inchuhin an indo ṭan a, tualchhung indona thleng vang hian mi maktduai 1.9 chu hmun him lamah an insawn chhuak tawh a ni. Mi nuai li vel chu an ṭhenawm ramah an tlanchhe tawh a, a tam zawk chu Egypt ramah an lut.

Egypt ramah tlanchhe lut an tam avangin, June ni 10 khan Egypt sorkar chuan an rama Sudan mi, kum 16-15 inkar lut turte tan visa a phut a ni. Heti chung hian visa nghakin Sudan mi sang tel chu ramriah an inkhuar a ni.