N.Korea hotu Kim-a'n Russia a thlawp thu Putin a hrilh

North Korea hotu, Kim Jong-un chuan Russia national day puala nimina Russia president Vladimir Putin hnena lawmpuina a hlan rualin, kawng hrang hranga Russia chu an thlawp tlat thu a hrilh.

Russia-in Ukraine a run hnuah ram hrang hrang, a bikin khawthlang ramte chuan Russia nena an inzawmna hi an titawp hlawm a, North Korea hi Russia nena an inṭhianṭhatna la vawng nung reng ram tlemte zingah a la tel a ni.

Kim thuchah hi official Korean News Agency (KCNA) chuan tichhuakin, Ukraine leh Russia buaina chungchang chu a hming hmerhin sawi lang lo mah se, President Putin-a thutlukna leh kaihhruaina siamte chu fakawm a tih thu a tarlang a ni. "Russia mipuite'n an ram humhimna tura an beihna te, an ram hmasawnna tura a hmalaknaahte North Korea mipuite chuan an thlawp tlat a ni," a ti. Rorelna dik tak chu a ding chang ngei dawn a, Russia chuan hnehna ropui tak a la chang dawn tih a sawi bawk.

N.Korea hian Russia leh Ukraine indona thleng mek chu US-in Russia tihchhiat a tumna hmanrua niin a sawi a, Ukraine sipaite tana ralthuam a thawn ṭhinte pawh a dem thu a sawi. A ṭum khatna atan kum 2019 khan Kim leh Putin hi an lo inhmu tawh a ni.

Hetih lai hian kumin January thla khan US chuan N.Korea chu Russia mercenary group, Wagner hnena rocket leh missile peah a puh ve thung a, mahse, N.Korea chuan he puhna hi a pha thung. March thla khan Russia-in Ukraine a beih meknaa hman turin N.Korea aṭang ralthuam lakluh a tum thu finfiahna an nei niin a sawi bawk.