Romania-in Kenya rama an ambassador ko haw

Romania sorkar chuan Kenya rama an ambassador, Dragos Tigau chu Africa mite hmuhsitna ṭawngkam mawi lo tak a chhakchhuah avangin an ramah a ko haw.

Dragos Tigau hian April ni 26-a Kenya khawpui, Nairobi-a UN building-a meeting an neih ṭumin, Africa mite chu zawng nen a khaikhin a ni. Meeting neihna pawn lama zawng a hmuh chuan, "African group pawhin min rawn zawm ve e," tiin a sawi a ni. He a thusawi chungchang hi kar liam ta Ningani khan Kenya Foreign Affairs official Kamau Macharia chuan a sawi chhuak a, Tigau thusawi hi thup bosak tum a ni tih a sawi bawk.

Zirtawpni liam ta khan African diplomat-te chuan mipui hnenah ngaihdam dil turin Tigau hi an phut thu an sawi. Romania sorkar chuan kar liam ta khan hemi chungchang hi hriattir an ni ve chauh tih sawiin, an ambassador pawh hi koh haw nghal a nih tur thu a puang a ni. Romania Foreign Affairs ministry chuan ngaihdam dilna siam nghalin, chi inthliarna leh inhmuhsitna lam hawia chet leh thusawi reng reng chu an pawm lo tih sawiin, Africa ramte nena an inlaichinna pawh a chhiat phah loh an beisei thu a tarlang.

Kum 2014 khan Armenia rama Romania ambassador chuan Juda-te hmuhsitna leh, mahni anpui kawp chungchang duh lohna lam hawiin thu a sawi tawh bawk a, ani pawh hi koh haw a ni bawk.

Tigau thusawi leh, Romania sorkarin a koh haw chungchangah hian Kenya sorkar chuan engmah sawi a la nei lo.