China-ah Palestinian President Abbas a zin

Palestinian President Mahmoud Abbas chu ni li cham turin nimin khan China ramah a zin.

Nimin zing khan President Abbas hi a thleng a, hei hi China ram a tlawh ṭum ngana a ni. A cham chhung hian China President, Xi Jinping leh premier Li Qiang-te meeting a neihpui ang.

China Foreign Ministry thupuangtu, Wang Wenbin chuan Palestinian hruaitu hi China mipuite ṭhian ṭha tak a ni tih kar hmasa khan a sawi a; Palestinian mipuite'n an dikna chanvo neih tuma an beihna chu China chuan a thlawp thu a tarlang. Palestinian official Abbas Zaki pawhin China leh Palestinian chu ṭhian ṭha, unaute ai pawha inpawh zawk an ni, a ti.

Israel leh Palestinian-te inkara inremna a awm theihna tura inbiakna an neih theihna atan, China chuan a ṭul anga hmalak a inhuam thu pawh a lo sawi tawh a ni. Israel leh Palestinian-te'n remna zawnga inbiakna an neih hi kum 2014 aṭang khan an chawlhsan tawh a ni.

China hian Middle East nena inlaichinna nghet zawk siam chhoh a tum a, March thla khan Saudi Arabia leh Iran-te'n inremna an siam theihna turin Beijing-ah ram pahnih aiawhte inbiakna hunte a buatsaih a ni. Nikum December thla khan a ṭum khatna atan China-Arab States Summit neih a ni a, he summit-a tel tur hian President Xi chu Saudi Arabia-ah a zin. Kumin February thla khan Iran President, Ebrahim Raisi pawh China ramah hian a zin bawk a, kum 30 chhunga Iran hruaitu zinga China ram tlawh hmasa ber a ni.