Japan PM-in Child Care Plan a tlangzarh

Japan Prime Minister, Fumio Kishida chuan an rama nau piang zat tla hniam zel siam ṭhat a, nau piang an pun theihna tura sorkarin Child Care Plan thar a siam chu nimin khan a tlangzarh.

He ruahmanna thar hnuaiah hian sorkar chuan kum thum chhung chu naupang enkawlna atana nu leh pa emaw, anmahni enkawltute hnenah allowance pekna turin kumtin yen trillion 3.5 vel a dah dawn a ni. Hei bakah hian company-te chu working style siam rem dante ngaihtuah a, kar khatah ni thum chawlh lak theih dante siam turin a ti bawk.

Hetih lai hian zir chiangtute chuan sorkarin chhawmdawlna a pek tur avang ngawt hian an rama nau piang zat tla hniam zel siam ṭhatna kawngah awmzia a neih lutuk an ring lo tih an sawi thung. An ram sorkar chuan kum sawmthum chhung zet nau piang zat tla hniam zel siam ṭhat tumin hma a la tawh a, mahse, an la hlawhtling thei chuang lo tih an sawi bawk. Hei bakah chhawmdawlna pek tur atana sum dah tur hi sorkar hian khawi aṭangin nge a pek dawn tih zawhna te awmin, an ramin sum lama harsatna a tawh mek belhchhahtu a ni thei dawn niin an ngai.

Japan ramah hian nau piang zat hi a tla hniam zel tawh a, sorkar data aṭanga a lan danin, kum 1990-a chawhruala nu-in nau a hrin zat hi 1.57 a nih laiin, nikumah khan 1.26-ah a tla hniam tawh. Nikum chhunga Japan rama nau piang zat chu nuai 8 aiin an tlem a ni. Sorkar chuan nau piang an pun chhoh leh theih dan tur ngaihtuahin, ruahmannate a siam chho a ni.