Italy PM hlui Silvio Berlusconi vui liam a ni

Italy Prime Minister hlui, Silvio Berlusconi chu Thawhṭanni khan kum 86 mi niin a thi a, nimin khan an ram chawimawina nen Milan-a Duomo Cathedral-ah vui a ni.

Silvio Berlusconi hi Leukemia vangin kar ruk zet damdawi inah enkawl a lo ni tawh a, damdawi in aṭanga a chhuah hnu kar thum, kar liam ta Zirtawpni khan in check-up turin Milan-a San Raffaele hospital-ah a lut leh a, mahse, a dinhmunin ṭhat loh lam panin, Thawhṭanni khan he damdawi inah hian a thi a ni. Doctor-te chuan Berlusconi hian thisen cancer a vei tih an sawi. Kum 2016 khan a lung (heart) zai a ni tawh a, 2020-ah coronavirus vangin damdawi-inah hun eng emaw chen enkawl a lo ni tawh bawk.

Right-wing Forza Italia party hruaitu, Berlusconi hi kum 1994-2011 inkar khan ṭum thum Italy Prime Minister niin, PM dinhmun a chelh chhung hi kum kua a ni. Forza Italy party hi tuna Italy Prime Minister Giorgia Meloni kaihhruai right-wing ṭangrual sorkarah a tel ve mek a ni.

Billionaire media mongul hi mipat hmeichhiat lam hawia a chet danah leh eirua puhna chungchangah te, chi inthliarna lam hawia a ṭawng chhuah ṭhin danahte hmingchhiatna hrang hrang nei mah se, Italy PM ni rei thei ber a ni.