Pakistan-in Russia crude oil man tlawm zawkin la lut

Pakistan chuan man tlawm zawkin Russia crude oil a leisak a, oil phurtu lawngin Karachi lawng chawlhna hmun a thleng.

Pakistan leh Russia hian crude oil man tlawm zawka leina tur hian nikum February thla aṭang khan inbiakna an lo nei tawh a, hun eng emaw chen an sawi dun hnuah inremna an lo siam a ni.

Prime Minister Shahbaz Sharif chuan an ram mipuite hnenah an lo tiam tawh chu an tipuitling ta niin a sawi a. Information Minister, Marriyum Aurangzeb pawhin ram mipuite tan liau liaua tih a nih thu a sawi bawk.

Pakistan deputy Oil Minister, Musadiq Malik chuan Russia crude oil, ton 1,00,000 lei turin irnemna an siam tih a sawi a, an leina man zat erawh a sawi lang lo. Heng oil hi lawng pahnih hmanga phurh luh a ni dawn a, lawng pakhat chu thleng tawhin, pakhat dang thlen hun tur erawh a sawi lang lo. Hei bakah lawngah hian eng zata tam nge oil hi a phurh a ni tih sawi lan a ni lo bawk.

Leiba ngah avanga sum lama harsatna tawk mek, Pakistan hian an harsatna aṭanga inkhaichhuahna turin International Monetary Fund (IMF) aṭangin loan, USD tld 6 a beisei a, inbiakna pawh neiin inremna erawh an la siam thei lo a, an inbiakna pawh December thla thleng atan an titawp rih.