Khawvel pumah in aṭanga tlanchhia mi mtd 110 awm

United Nations High Commissioner for Refugees (UNHCR) chuan khawvel pumah mi matkaduai 110 vel chu chhan hrang hrang vangin an chenna aṭanga tlanchhia an awm tih a sawi.

UNHCR hian nimina annual Forced Displacement report a tihchhuahah, nikum chhung khan mi maktaduai 19 chu an chenna hmun aṭanga tlanchhiat ngaiin an awma , a hmaa mite nen nikum kum tawpah chuan hmun danga insawn chhuah ngai hi maktaduai 108.4 an tling a ni, a ti.

Kumina kar riat zet Sudan tualchhung indona a thlen hnuah, hmun danga tlanchhia hi maktaduai 110 an tling chho tawh a ni, tiin UN refugee hotu Filippo Grandi chuan a sawi.

Himna zawnga hmun danga insawn chhuak zat tarlanah hian ram chhunga tlanchhia leh, ram danga tlanchhiate a huam vek a, an zingah hian ram danga raltlan chu 37.5% an ni tih report chuan a tarlang bawk.

Kum 2011-a Syria tualchhung buaina thlen hma khan khawvel pumah ram dang leh ram chhunga tlanchhia hi mi maktaduai 40 vel an awm a, kum 20 dawn chu a zat hi a danglam chho vak lo. Mahse, kum 2021 aṭang khan nasa takin an rawn pung chho a ni. Kum 2022-ah khan Ukraine mi mtd 11.6 vel chu insawn chhuah ngaiin an awm a, an zinga mtd 5.9 chu an ram chhungah vek tlanchhiain, mtd 5.7 chu ram dangah an tlanchhia a ni.

Grandi chuan raltlan an pun chhoh mek karah, ram tam tak chuan raltlan lak luh chungchangah dan khauh zawk siamin, ral tlante thawn kir hna pawh an kalpui fo tih a sawi. European Union-a khawchhak lam, Poland leh Hungary chuan Middle East leh North Africa aṭanga ral tlante a la lut duh lo a, United Kingdom pawhin dan thar siamin, lawng hmanga English Channel kaltlanga an rama lut turte danna a siam bawk.