Israel sipai 3 thah an nih avangin sipai officer 3 hrem dawn

Israel Defence Force chuan tun thla tira Egypt nena an inrinaa an sipaite'n beih an tawh leh, Israel sipai pathum kah hlum an nih chungchangah sipai officer pathum hrem an ni dawn a ni tih a sawi.

June ni 3 khan Egypt police pakhat chu ramri kaltlangin Israel ram chinah a lut a, ramria Israel sipai duty-te chu hmun pahnih aṭanga kapin, sipai pathum a kap hlum a ni. Israel-Egypt border area-ah hetianga inkahna hi a thleng ngai lo hle a ni.

Border area-a thil thleng chungchang hi Israel sipai chuan chhui nghalin, inkahna ṭum hnih thleng hi a hun a inkar hlat hle tih an sawi. Duty-te hriat loha Israel ram chhunga Egypt police a luh theih dan te, guard post pahnihna a beih leh hmaa hun rei tak Israel ram china a awm theih chhante an chhui a ni. Thawhlehni khan an chhuina report hi tichhuakin, border area-a security gate chu kalh loha dah a ni tiin, ruahmanna fel lo tak avangin Israel sipaite'n an tawrh phah ta a ni, a ti. Ramri hi khar nghal a ni dawn tih a tarlang bawk.

Inbeihna thlenna area-a duty, 80th Division commander Brig. Gen Yitzhak Cohen chu dan a kenkawh ṭhat loh avangin hrem a ni dawn a, a ni bakah Paran brigade commander Col. Ido Sa'ar leh Bardelas battalion commander Lt.Co.Ivon Kon te pawh hrem an ni bawk ang.

Israel leh Egypt hi kum 40 chuang chu inrem taka awmin, security lamah pawh thawh dunna ṭha tak an nei a, ramriah hian buaina leh inbeihna a thleng ngai lo a ni.