Myanmar-ah thla 20 chhungin civil mi 6,000 thah an ni

Peace Research Institute of Oslo chuan, kum 2021 February thlaa Myanmar sipaite'n civil sorkar paihthla a, thuneihna an chan aṭang khan thla 20 chhungin civil mi 6,000 chuang thah an ni tawh a ni, a ti.

Thawhlehni khan report hi tichhuakin, kum 2021, February ni 1 leh 2022, September ni 30 chhung khan Myanmar ramah hian civil mi 6,337 an thi a, mi dang 2,617 in hliam an tuar bawk a ni, a ti. Sipaite chu civil mi thi zinga tam zawk thattu an ni a, hemi rual hian sipai sorkar dodaltu pawlte pawhin thisen an chhuah tho bawk tih report chuan a tarlang.

Report thara civil mi thi zat an tarlan hi a hmaa pawl hrang hrangin thi zat an tarlante aiin a tam zawk hle a ni. Hemi chhunga mitthi tam tak chu report loh a awm ngei a rinawm avangin, report-a an tarlan ai hian tualchhung buaina thleng vanga civil mi thi zat hi an la tam zawk a rinawm thu an tarlang a ni.