Kuminah Sri Lanka-in President thlang thei dawn lo

Sri Lanka cabinet thupuangtu, Bandula Gunawardena chuan an ramin sum lama harsatna nasa tak an tawh mek avangin, kumina President thlang thei dinhmunah an ding lo tih a sawi.

Gunawardena chuan an ram economy tlachhia siam ṭhat leh, leiba tam tak an neih mek tihziaawm chhoh dan chu sorkarin a buaipui a, an ram sum dinhmunin ziaawm lam a la pan loh avangin, eng inthlan mah buatsaih a ni lo tih a sawi.

March thlaa local council 340-a inthlan neih tur pawh, tiam chin awm loin tihkhawtlai a lo ni tawh bawk. Eptu party-te chuan inthlan tihkhawtlai a nih avang hian sorkar chu na takin an sawisel a, mahse, President Ranil Wickremesinghe chuan inthlan buaipuina tur sum chu an nei lo tih a sawi a ni.

Minister of Transport and Highways leh mass media ni bawk, Gunawardena chuan an leiba neih mek chu tihziaawm phawt a nih loh chuan, ram dang aṭangin loan a la thei tawh lo tih a sawi. An ram kawngpui siam ṭhat leh tihchangtlunna atan USD mtd 53 mamawh a nih thu a sawi nghal bawk.

International Monetary Fund (IMF) chuan March ni 20 khan Sri Lanka tan hian sum lama an harsatna tawh mek laka khaichhuahna tur, USD tld 3 dawn loan pek a lo remti tawh a, mahse, an leibate tiziaawm phawt tura tiin, sum pek chhuah hun a tikhawtlai leh rih a ni. President hlui Gotabaya Rajapaksa term hman zawh tak loh hmang zawm turin nikum July thla khan Sri Lanka Parliament chuan Prime Minister hlui, Ranil Wickremesinghe chu President atan a thlang a, a term hi kumin November hian a tawp ang a, mahse, an ram sum dinhmunin a zir loh avangin kuminah inthlan hi an buatsaih thei dawn ta lo a ni. Hetih lai hian eptu lam chuan President Wickremesinghe chu a chak zawh loh a hlauh vanga inthlan tikhawtlaiah an puh thung.