Thiam loh chantir a nih pawhin Trump-a'n inthlan chuh thei dawn

US President hlui, Donald Trump chu sorkar document pawimawh dan loa kawl leh khawih chingpena puh a nih chungchangah thiam loh chantir a nih pawhin, kum 2024-a US President inthlan an neih turah a chuh thei dawn tho a ni.

Kum 77 mi, Trump hi US President a nihna aṭanga a chawlh hnuah, nikum khan Florida-a Mar-a-Lagor resort-ah sorkar document pawimawh a la kawlte chu hmuh a ni a, heng zingah hian national secuirty information pawimawhte pawh a tel. FBI chuan Mar-a-Lago resort aṭang hian document hi 11,000 chuang zet an hmu. Nikum Jnauary thla khan National Archives-ah classified document 20 dawn awmna, bawm 15 chuang a pe lut bawk. Document pawimawh khawih chingpena puhnaah hian Miami-a federal courthouse-ah thubuai eng emaw zat siamsak a ni a, US President hlui zingah federal charge siamsak hmasak ber a ni.

Hetih lai hian an puhna hrang hrangah hian thiam loh chantir a nih pawhin, Trump hian US President atan thlan a la ni thei dawn tho a ni. A thubuai ngaihtuah hun tur hi a la hla a, hei vang hian zalen takin campaign pawh a nei thei ang. Trump hian nakkum November ni 5-a President thlanna neih turah, Republican candidate nih tumin a bei leh dawn tih a lo puang tawh a ni.

US Constitution chuan President chuh tum tan thil pathum phut a nei - Candidate chu US-a a piang a ni tur a ni, kum 35 a tling tur a ni a, US-ah kum 14 tal a cheng tur a ni, tih a ni.