Imran Khan leh PTI hruaitute social media post chhui chiang dawn

Pakistan Prime Minister hlui leh Pakistan Tehreek-e-Insaf (PTI) chairman Imran Khan bakah, PTI hruaitu ṭhenkhat dangte social media profile chu chhui chian turin Federal Investigation Agency (FIA) hnenah hriattir a ni.

March 8 - May 9 inkara PTI worker-te'n ram chhung hmun hrang hranga tharum thawhna an thlen chungchangah, Imran Khan leh PTI hruaitu dangte hian an worker-te fuih zawngin an social media account-a video leh thil dang an post nia puh an ni. Hei vang hian an thil post-te hi chhui chian a ni ang. FIA hnenah hian social media site link 23 pek a nih thu police-te chuan an sawi a, hengte hi Instagram, Facebook leh Twitter amite an ni.

Police-te chuan an state-a tharum thawhna leh pawikhawihna thlen tur hian ṭhalaite chu social media kaltlangin fuih an ni tih an sawi.

May 9-a PTI hotu Imran Khan man a nih avanga PTI worker lungawi lote'n hmun hrang hranga buaina an siamah khan Pakistan sorkar building leh sipai hmun pawimawhte an khawih tel a, heng zingah hian Lahore Corps Commander House, Mianwali airbse, ISI building leh Rawalpindi-a Army headquarters-te a tel. Sorkar thil an tihchhiat hi Pakistan rupee (PKR) vaibechhe 25 hu vel a tling niin an tarlang. Buaina chhuak kaihhnawihah hian PTI worker 10,000 chuang man a ni.

Pakista sorkar chuan May 9-a sipai hmun pawimawh suasamnaa inhnamhnawihte chu Army Act leh Official Secrets Act hnuaiah an chungthu ngaihtuah a ni dawn tih a sawi.