'Pentagon leaker' Jack Teixeira thubuai 6 siamsak

Social media platform, Discord-a US sipai document pawimawh tiput rua puh, United States Air National Guard member, Jack Teixeira chu thubuai paruk siamsak a ni.

Kum 21 mi, Teixeira hi national defence information pawimawh a neih leh, a thawn darh chungchanga thubuai siamsakah hian thiam loh chantir a nih chuan, thubuai pakhatah hian kum 10 thleng lung in tantir leh, USD 2,50,000 zel chawitir theih a ni ang.

US justice department chuan Ningani khan Teixeira thubuai siamsak a nih thu hi puangin, Federal Bureau of Investigation (FBI) director, Christopher Wray chuan "Security clearance neite chu kan ram thurukte venghim leh vawng tlat tura beisei leh rin a ni," tiin thuruk tiput rua puh, Teixeira thiltih chu dan bawhchhiatna lian tak a nih thu a sawi. Teixeira hi April 13 khan man miin federal custody-ah dah a ni.

Jack Teixeira hian kum 2019, September thla khan Air National Guard hi a zawm a, kum 2021-ah top-secret security clearance a nei. Kum 2022, January thla aṭang khan document pawimawhte hi copy-in, gamer-te'na hman lar, online community Ddscord-ah hian a post ṭhin niin justice department chuan a sawi. Online-ah information pawimawhte hi amahin a type chhuah loh leh, a thlalakte a post ṭhin niin an tarlang. A thil post zingah hian Russia-Ukraine indona thleng mekah Ukraine hmalak dan te, thi zat te, US-in chhawmdawlna a pek leh, Russia chetdan chungchangte a tel. Hei bakah hian US sipaiin ram danga enthlak hna an thawh dan nia lang theite pawh a tel bawk.