China-in ṭum khata satellite kap chhuak tam ber record a siam

China chuan Ningani khan sattellite 41 phurtu, Long March 2D rocket a kap chhuak a, mission ṭum khata vanthengrenga satellite kap chhuak tam ber record a siam.

Rocket hi an ram huna chawhnu dar 1.30 khan Shanxi province-a Taiyuan Satellite Launch Centre aṭangin an kap chhuak a ni. China hian a hma lawkin a space station-ah astronaut pathum a lo tir tawh bawk.

Satellite kah chhuahte hian sensing service leh technology verification lam an thawk dawn a, heng satellite zinga a tam zawk, 36-te chu China-a commercial remote sensing satellite system-a siam hmasak ber, Jilin-1 series ami an ni. Heng rocket-te hi Jilin province-a commercial satellite siamtu, Chang Guang Satellite Technology Co., Ltd siam a ni.

Ningania an kah chhuah takte telin, China hian Jilin-1 satellite hi 108 a kap chhuak tawh a ni. A hmasa ber chu kum 2015-a a kah chhuah kha niin, kg 420-a rit a ni. Mahse, kum riat chhungin heng satellite-te hi siam ṭha zelin, a rih lam pawh kg 22 chauh a ni tawh tih an sawi.