US Secretary of State-in China a tlawh

United States secretary of state, Antony Blinken chu nimin khan ni hnih cham turin China ramah a zin a, kum nga dawn hnua US official zinga China ram tlawh hmasa ber a ni.

Antony Blinken hian nimin khan Beijing-ah China Foreign Minister, Qin Gang chu meeting a neihpui nghal. Diaoyutai State Guest House-a meeting an neihah hian ram pahnihte'n inlaichinna ṭha an siam theih dan turte an sawi dun. Vawiin hian China President, Xi Jinping pawh meeting a neihpui dawn nia sawi a ni bawk.

US leh China hian ngaihdan inang lo leh inepna tam tak an nei a, chung zingah chuan Taiwan chungchang te, China rama human rights dinhmun leh Hong Kong te, South China Sea chungchang leh Russia-Ukraine indona thleng mekah pawh an ngaihdan a inmil thei lo a ni. Heng chungchangte pawh hi Blinken hian sawi chhuah a tum a, mahse, ram pahnihte hian a ngaihdan erawh an sawhsawn a rinawm lem loh thung.

Blinken hian thla nga liam ta khan China hi tlawh a lo tum tawh a, mahse, US airspace-a China spy balloon nia hriat hmuh a nih avangin a zin tur hi a ṭhulh a ni.

US President, Joe Biden chuan Blinken zin chhuah hma, kar liam ta Zirtawpni khan China nena inelna an neih chhoh mekah buaina chhuah an duh loh chuan, ram pahnihte hian inbiakna hmanga bul an ṭan a ngai tih a lo sawi tawh a, President Xi nen pawh an inhmuh theih thuai a beisei thu a sawi.

Nikum November thla khan Bali-ah President Biden leh Xi hi rei vak lo an lo inhmu tawh a, ram pahnihte'n inhriatthiam lohna an neih ṭhin pumpelhna atan, inbiakna ṭha taka neih chhoh an remti a ni. Hemi ṭum hian China rama Blinken zin hi an lo remti dun bawk. US-a China spy balloon hmuh a nih hnuah ram pahnih hruaitute hi an inbe zui mumal tawh lo nia sawi a ni.