Mi 120 phurtu Philippine lawng tuipuiah a kang

Khualzin leh thawktu mi 120 phurtu, Philippine lawng chu nimin khan tuipuiah a kang.

M/V Esperanza Star hi Siquijor province aṭanga Bohol province a pan laiin, tuipuiah hian a kang niin coast guard-te chuan an sawi. Chhanchhuah hna thawh nghal a ni a, lawnga chuangte chu him taka hruai chhuah an ni tih coast guard thupuangtu, Joy Gumatay chuan a sawi. Lawngah hian khualzin 65 leh thawktu 55 an chuang.

Philippine ramah hian thlipui thawk, lawng enkawl ṭhat tawk loh, an phurh tawk tur aia tam phurh leh, himna lam ngaihthah avangin tuipuia chet sualna hi a thleng fo a ni. March thla khan mi 250 phurtu lawng chu Basilan province chhim lamah a lo kang tawh bawk a, mi 31 an thi a ni.

Kum 1987 December thla khan Dona Paz lawng chu fuel tanker nena an insut avangin a pil a, mi 4,300 chuang an thi. Khawvela tuipuia chet sualna thleng rapthlak ber zinga sawi a ni.