Dan loa pem lutte dap chhuahnaah UK PM tel ve

United Kingdom (UK) Prime Minister Rishi Sunak chu kar liam taa UK home office enforcement official-te'n an rama dan loa pem lutte dap chhuah hna an thawhnaah a tel ve.

Dan loa lutte dap chhuah hna thawhnaah hian ram dang mi 105 man an ni a, hengte hi ram 20 chuang aṭanga lutte an ni.

Kum 43 mi, Rishi Sunak hian bullet proof vest nena inthuamin, London hmar lam Brent-a enforcement officer-te hnathawhnaah a telpui a ni.

British Indian hruaitu hian dan loa an rama lutte dap chhuah chu a kaihhruai sorkarin a ngaih pawimawh ber zingah a dah tur thu a lo sawi tawh a ni. "Dan loa rawn luta hnathawktute hian kan khawtlang an tibuai a, dik taka hnathawkte hna an chhuhsak a ni. Hetianga ka dan bawhchhiate hi kan um zui zel dawn a ni," tiin UK home secretary Suella Braverman chuan a sawi.

Kar liam taa dan loa lut an man zinga 40 chuang chu Home Office-in a hreng zui a, mi dangte erawh chu immigration bail-a chhuahtir an ni. Heng an mante hi visa mumal nei loa UK-a hnathawka awmte an ni a, khawi ram aṭanga lutte nge an nih erawh puanzar a ni lo. Dan loa lut an manna hmunte hi restaurant, motor silna hmun, nail bar, lu mehna hmun leh ei tur zawrhna hmunahte a ni tih Home Office thuchhuah chuan a tarlang. Hmun ṭhenkhatah chuan pawisa faite an man tel bawk.