West Bank-a inbeihnaah Palestinian 3 an thi

Israel sipiate chuan nimin zing khan West Bank-a Jenin khua an bei a, Palestinian mi pathum an kap hlum a, mi dang 29 an hliam bawk niin Palestinian health ministry chuan a tarlang.

Health ministry chuan Israel sipaite'n an kah hlumte hi Khaled Darwish, 21, Qassam Sariya, 19, leh Ahmed Saqr, 15-te an nih thu a sawi.

Hetih lai hian Israel sipaite chuan Jenin refugee camp an dap laiin, Palestinian lam hian rawn bei hmasain an lo kap let ve niin an sawi thung. Khawpui an chhuahsan dawn hian, sipai motor chu bomb a nih thu leh ,motor pawh a chhiat thu an sawi a, hei vang hian sipai beitute chu helicopter aṭangin kah let an ni, an ti. Israel media chuan he inbeihnaah hian Israel sipai eng emaw zatin hliam an tuar tih an sawi ve bawk.

Israel leh Palestinian-te hi kumin hian West Bank-ah ṭum eng emaw zat an lo inkap tawh a, inbeihnaah hian Palestinian mi 120 leh Israel mi 20 vel an thi tawh a ni. West Bank-a Jenin khua hi Palestinian hel tamna hmun a ni. Palestinian-te nena an inbeihnaa thi zinga a tam zawk hi hel an ni tih Israel chuan a sawi.

Hetih lai mek hian Israel sorkar chuan Palestinian ram a luah, West Bank-a Juda-te chenna tur in sak belhna tur ruahmanna chu Pathianni khan a pharh. He ruahmanna tharah hian West Bank-a hmun hrang hrangah in 4,560 sak belh tum niin Surpeme Planning Council phalna erawh an lak phawt a ngai ang. US leh ram dangte'n Palestinian ram a luaha in sak belh tawh lo tura an nawr chungin, Israel hian in sak chhunzawm erawh a la tum a ni. Finance minister Bezalel Smotrich chuan, "He biala Israel thuneihna sawhngh ehna turin in sak hna hi kan chhunzawm zel dawn a ni," a ti.