Brazil-ah thlipui tleh leh tuilian vangin mi tam tak sawn chhuak

Brazil chhim lamah kar liam ta kartawp lam khan thlipui tleh leh ruahsurin chhiatna a thlenah mi 13 an thi a, mi sang tel chu hmun him lamah sawn chhuah an ni bawk.

Thlipui leh ruah sur nasa tak hian Rio Grande do Sul state-a khaw eng emaw zatah chhiatna a thlen a, an state khawpui Portol Alegre pawhin a tuar nasa hle. Chenna in 5,000 dawn a chhia a, Pathianni khan mi 84,000 vel chu kawlphetha nei loin an awm bawk a ni.

Porto Alegre aṭanga darkar chanve vel tlan, mi nuai 2.4 chenna Sao Leopoldo khuaah chuan darkar 18 chhungin ruah 246mm a sur hman a, hetianga ruah sur nasa hi an la tawng ngai lo tih Porto Alegre mayor Ary Jose Vanazzi chuan a sawi. Novo Hamburgo, Lindolfo Collor leh Sao Leopoldo khuate chu tuiin a chim nasa hle a ni.

Thli tleh leh ruah sur vanga harsatna tawkte chhanchhuah hna hi ngawrh taka thawh chhunzawm mek a ni a, hetih lai hian tunkar chhoah ruah hi nasa takin a la sur chhunzawm dawn niin khawchin zirtute chuan an sawi.

Brazil hian khawchin ṭha lo vanga chhiatna hi an tawng fo a, kumin Feruary thla pawh khan Sao Paulo state-ah ruahsur nasain tuilian leh leimin a thlenah mi 65 an lo thi tawh bawk a ni.