Switzerland mipuite'n climate bill thar an thlawp

Switzerland Alps tlanga vur tui chak lutuk chu sik leh sa danglam chak lutuk vang a ni tiin, hemi do letna tura tuialhthei hman tlem leh 2050-a carbon pek chhuah 0% nih tir tuma sorkarin climate bill thar a siam chu Switzerland mipui tam zawkin an thlawp.

Sorkarin climate bill a siam chungchangah hian Pathianni khan mipui vote lak a ni. Swiss mi vote thlaktu zinga 59.1% chuan he bill hi an thlawp a, a duh lo lamah 40.9% a tla ve bawk.

Bill thlawptu lam chuan, "Alps tlanga vur tui chak lutuk chu Switzerland tan thil pawi tak a ni thei tih hriain, kan ram hian kan environment leh kan energy neihna hnarte hi kan humhalh a ngai a ni," an ti. Switzerland sorkar chuan he bill hlawhtlinna tur chuan ram dang aṭanga tuialhthei leh gas an lak luhte titlem zel chunga hman nawn theih energy lama tan an lak a ngai dawn tih an sawi.

Switzerland hian an mamawh oil leh gas hmun thuma ṭhena hmuh khat hi ram dang aṭangin an la lut a, hei hi Swiss People's Party (SVP) right-wing te chuan ṭan chhanah neiin climate bill an pawm ve theih loh thu an sawi. He bill hian ram chhungah thil man a tihsan tur thu an sawi ve thung a ni.

Switzerland-a Alps tlanga vurte hi kum 2001 aṭanga 2022 inkar khan hmun thuma ṭhena hmun khat an tuiral hman. Swiss glaciologist lar tak, Matthias Huss chuan climate bill pawm a ni chu a lawm thu sawiin,"Kan sik leh sa zirna lama science thlirnain pawm a hlawh hi a lawmawm tak zet a ni," a ti.