UN hotuin Palestinian rama in sak titawp turin Israel a hrilh

United Nations Secretary-General, Antonio Guterres chuan Israel chu Palestinian ram a luaha Juda-te chenna tur in a sak chu titawp turin a hrilh.

Israel-in Palesintian rama in a sak ṭhin chu Israel-Palestinian inkar boruak tichhetu leh tharum thawhna thlen phahna a ni ṭhin tiin, inremna kawng zawnga hmalakna tibahlahtu a ni tih Guterres chuan a sawi a ni. Israel-in Palestinian ram a luahsak hian Palestinian-te ram leh natural resources thlengin a khawihsak a, mipuite zalen taka an chet velna a dalsak a, Palestinian-te dikna chanvo leh an ram chunga thu an neihnate a rahbehsak a ni, a ti.

Thawhṭannia Israel sipaite'n West Bank-a Jenin refugee camp an dap ṭum a, Palestinian-te nen an inkah a, Palestinian mi panga kah hlum an nih hnuah UN hotu hian he thu hi a sawi a ni. Hemi ṭuma inbeihnaah hian mi panga an thih bakah, mi dang 90 chuangin hliam an tuar a ni. Israel sipaite chuan Palestinian helte'n an kah hmasak thu sawiin, an inbeihnaa thite pawh hel an ni tih an sawi.

Israel-in Palestinian ram a luaha Juda-te chenna tur in a sak hi ram hrang hrangte'n sawiselin international law kalh a ni tih an sawi. Israel ram ṭhianṭha, US pawhin Palestinian rama in sak ṭhin chu a dem thu a lo sawi tawh bawk.

Hetih lai hian Pathianni khan Prime Minister Benjamin Netanyahu chuan West Bank-a in sang chuang sak belhna tur ruahmanna chu a pawm. He ruahmanna tharah hian West Bank-a hmun hrang hrangah in 4,560 sak tum a ni a, Israel Supreme Planning Council-in a pawmpui ve leh phawt a ngai dawn a, tun kar hian an ngaihtuah rin a ni. Kumin January thlaa lak luh a nih hnuah, PM Netanyahu kaihhruai ṭangrual sorkar hian Palestinian ram an luaha in 7,000 chuang sak tharna tur a pawm tawh a ni.