China-in Russia hnena ralthuam thawn loh a intiam : Blinken

China tlawha zin, US secretary of state Antony Blinken chuan China chuan Ukraine nena indo mek, Russia hnenah ralthuam thawn loh a intiam nawn leh tih a sawi. Hemi rual hian Chinese private firm-te lakah erawh hlauhthawnna a la neih thu a sawi.

Kum 2022, February thlaa Russia-in Ukraine ram a run hnuah, khawthlang ram hrang hrangte'n Ukraine sipaite puiin ralthuamte an thawn a, hei vang hian China chuan Russia puihna turin ralthuamte thawn a tum niin US chuan a lo puh tawh a ni. US President Joe Biden leh Ukraine President Volodymyr Zelenskyy-te chuan China-in Russia hi a pui a, ralthuamte a pe a nih chuan khawvel pum indona a chhuah mai a hlauhthawn thute an lo sawi tawh a ni.

Ni hnih chama China rama zin, Blinken hian China hruaitute hnen aṭangin Ukraine beihna tura Russia nena ralthuam thawn lo tura an intiamna a dawng tih sawiin, hei hi policy pawimawh tak a nih thu a sawi. US leh China inlaichinna chungchangah pawh, ram pahnihte'n inzawmna ṭha leh nghet an neih a ṭul thu China-in a sawi chu a ṭawmpui hle tih a sawi bawk.