Thailand-ah Myanmar sipai hotute inbiakna neihpui

Thailand sorkar chuan Thawhṭanni khan Myanmar sipai hotute inbiakna a neihpui.

Kum 2021-a sipai chakna hmanga Myanmar civil sorkar paihthlak a nih hnu leh, sipai sorkar dodaltu chungah tharum thawhna nasa tak a thlen hnu kha, Myanmar sipai sorkar chu member 10 awmna, Association of South-East Nations (ASEAN) high-level meeting-ah an tel ve phalsak an ni lo.

Thailand sorkar hian regional block hruaitute inhmuh khawmah Myanmar sipai hotute telh ve tawh tura rawtna awmte ngaihtuah turin meeting hi a buatsaih a, he hunah hian ASEAN Foreign Minister-te pawh sawm an ni. Mahse ASEAN member ṭhenkhat chu an tel duh lo a, a tel pawhin junior official-te zawk an tir a ni.

Meeting kotu, Thailand Foreign Minister, Don Pramudwinai chuan Myanmar tualchhung buaina chuan mi tam tak a ṭhenawm ramah a ratlantir a, insumdawn tawnna thlengin a nghawng na hle tih a sawi. Heng buainate hi an ngaihthah reng chuan Thailand chu a tuar nasa ber a ni dawn tih sawiin, Thailand chu ASEAN zingah buaina tihtawp thuai duhtu awm chhun a ni, a ti.

ASEAN chair ni mek, Indonesia pawh meeting-ah hian a tel duh lo a, Indonesia Foreign Minister Retno Marsudi chuan Myanmar chungchangah bloc meeting an neihah pawh an inlungrual thei lo a, hmalakna tur engmah an siam thei ngai lo tih a sawi.