Pakistan PM hlui Imran Khan bail pawhseisak

Pakistan court chuan eiruk thubuaia Prime Minister hlui Imran Khan-a bail chu a pawhseisak.

Imran Khan hian man nawn a nih leh chuan, a party, Pakistan Tehreek-e-Insaf (PTI) worker-te chu nawrh huaihawt turin a lo fuih lawk a ni. Thla hmasa khan eiruk thubuaiah hian man a ni a, hemi ṭum PTI worker-te chuan ram chhung hmun hrang hrangah lungawi lohna lantirin buaina nasa tak an siam a, police-te nen innawr buaiin sorkar leh sipai hmunte an bei tel a ni.

Supreme Court-in man a nih dan chu dan kalh a ni tia a sawi hnuah Imran Khan hi chhuah a ni. Mahse a chhuah hnuah pawh Pakistan sorkar chuan October thlaa inthlanpui an neih tura chuh thei loa siam tumin, man dan kawng a la dap reng niin Khan chuan a sawi.

Thawhṭanni khan Islamabad-a special corruption court chuan Imran Khan leh a nupui, Bushra Bibi-te bail chu July 4 thleng atan a pawhseisak. Hei bakah hian a thubuai dang 15-ah pawh bail a dilna phalsak a ni tih a legal team member, Gohar Khan chuan a sawi bawk.

Nikuma Parliament-in no-confidence vote hmanga PM a nihna aṭanga a paihthlak hnuah, Imran Khan hian Pakistan sorkar leh sipaite a bei zui nasa hle a, sorkar chu inthlanpui buatsaih hma turin a phut a ni.