Beirut-a nawrh huaihawtnaah Mi 142 in hliam tuar
Lebanon khawpui, Beirut-a lawng chawlhna hmuna thil puakin chhiatna nasa tak a thlen chungchanga sorkar laka lungawi lohna lantirin nawrh huaihawt chhunzawm a ni. Inrinni zan khan nawrh huaihawt leh police-te innawr buaiin, mi 142 in hliam an tuar a, police officer pakhat a thi bawk.
Lawng chawlh hmuna thil puahna, warehouse-a puak thei thil hlauhawm tak kum eng emaw zat dah a nih chungchangah mipuite chuan sorkar chu mipuite himna ngaihthahah puhin an dem thu an sawi. Nawrh huaihawte hian Parliament luhchilh an tum a, hei hi security force-ten lo dangin tear gas te an hmang a ni.
Pungkhawmte hian security force-te hi lungin an tawng zui a, daidanna an siamte chu tihchhiat tumin an bei a, Foreign Ministry leh Economy Ministry office-te chu an luhchilh zui a ni.
UN-in emergency fund USD mtd ruk pek belh
United Nations chuan Beirut-a chhiatna rapthlak thleng tuartute chhawmdawlna turin US dollar maktaduai ruk a pek belh leh. Hemi hma hian UN Lebanese Humanitarian Fund aṭangin USD maktaduai kua a lo pe tawh a ni.
UN Secretary-General Antonio Guterres deputy spokeman Farhan Haq chuan ṭanpuina an pek belh hi chhiatna thlenga hliam tuarte enkawltu, damdawi-in hrang hrang puihna atan te, thil puakin chenna in a tihchhiat thawm ṭhatna atan leh, rilru lama harsatna tawkte puihna atante hman a ni ang, a ti.
Thawhlehni zana thil puak na tak khan Beirut-a World Health Organisation (WHO) hi Covid-19 hri leng mek atana hman tur, damdawi leh protective equipment dahna 17 a tichhe tel. Hei vang hian WHO chuan Covid-19 dona kawnga hma lak chhunzawm zelna atan US dollar maktaduai 15 mamawh a nih thu a sawi.