Tuilian vangin Somalia mi 1,50,000 chuangin An chenna in chhuahsan tawh

United Nations (UN) thu­puangtu chuan June thla aṭang khan Somalia mi 1,50,000 chuangin an ram chhim lama tui a len vangin an chenna hmun an chhuahsan thu a sawi.

Somalia-a UN Refugee Agency (UNHCR) chuan kar liam ta khan tuilian vangin mi 23,000 velin an awmna hmun an chhuahsan thu a tarlang. Somalia chhim lama tuilian vang hian kumin June thla aṭang khan hriat theih chinah mi 1,50,000 chuangin an chenna hmun  an chhuahsan tawh a ni.

Kumin hian Somalia ramah hian ruahtui a tla hnem a, tuilian a thlen fo avangin mi tam tak hmun him lamah an tlanchhia a ni. Tlanchhia zinga tam takte chu hmun khatah awmkhawmin, awmna tur lailawk an siam a, ei leh in lamah te harsatna tawkin, mi tam tak chu rilṭamin an awm a ni. Hei bakah hian an awmkhawmna hmunte hi a faiin a thianghlim tawk lo a, damdawi lama enkawlna pawh a ṭha lo hle. 

UNHCR thupuangtu chuan tuilian tuarte hnenah hian blanket, plastic sheet leh thildang an mamawh te, pawisa faite pek an ni tih a sawi. Heng mite ṭanpui tur hian ramdang leh pawlte a sawm. Somalia-ah hian Covid-19 hri kai mi 3,227 an awm tawh a, heng zinga mi 1,728 chu enkawl dam ni tawhin, mi 93-in an thihpui tawh. Hri leng an tuar bakah tuilian hian an ramah harsatna a thlen belhchhah hle a ni.