US President-i'n China President 'dictator' tiin a sawi ; China-in President Biden thusawi a chhang let nghal

US secretary of state Antony Blinken-a'n US leh China inlaichinna siam ṭhat dan ngaihtuaha China a tlawh hnu lawkah, US President Joe Biden chuan Thawhlehni khan China President, Xi Jinping chu 'dictator' tiin a sawi.

President Biden hian California-a fund raising event-a thu a sawiah, tun hnaia US-in China spy balloon a kah thlak chungchanga a sawinaah, 'dictator' tan chuan thil zahthlak tak a ni, a ti.

China chuan President Biden thusawi hi a rawn chhang nghal a, Biden chu thil awm lo tak leh pawisak nei lo taka ṭawng chhuakah an puh. China foreign ministry thupuangtu, Mao Ning chuan Biden thusawi chu thu dik lo, diplomatic protocol palzutna lian tak, China zahawmna tihchhiatna tuma, mi huang daiah a puh. China chuan US President thu sawi na takin a dem tih a sawi bawk. Tun hnaia US ram chhunga China balloon hmuh pawh chu spy balloon ni loin, khaw chin zirchianna zawk leh, US-ah chuan tihpalh thila lut a nih thu a sawi.

Thawhṭannia China President Xi nena meeting nei, Antony Blinken pawhin Biden thusawi danah hian sawizui a la nei lo bawk. Meeting-a hian Blinken leh Xi chuan US leh China inkar siam ṭhat dan turte an sawi dun a, mahse, inremna erawh engmah an siam thei lo thung. Ram aiawhte inbiakna neih chhunzawm zel erawh an remti a ni.