EU ramte'n Ukraine sipai 30,000 an train dawn

European Union member ramte chuan Russia nena indo mek, Ukraine ram sipai 30,000-te chu kumin chhungin training an pe dawn.

Ukraine defence ministry chuan thuchhuah siamin, EU Military Assistance Mission for Ukraine chuan kuminah Ukraine sipai 30,000-te training an pek tur thu hi a sawi, an zingah hian territorial defence forces sipaite pawh an tel dawn a ni, a ti.

Kumin Februay thla khan EU official-te chuan Ukraine sipai training pek an tum, a hmaa 15,000 tura an lo tih chu 30,000-a tihpun an lo intiam tawh a ni.

EU hian Thawhlehni khan kum 2024-27 chhunga Ukraine ram chhawmdawlna turin USD tld 54.58 pek a tum thu a sawi bawk.

Nimin khan Ukraine leh Britain huaihawtin London-ah Ukraine ram tundin thar lehna tura hmalakna tur, Green Marshall Plan chungchangah conference neih ṭan a ni. Ukraine chuan an ram din thar lehna tura bul ṭanna atan USD tld 40 a ngaih tur thu sawiin, iron and steel industry chu an ngai pawimawh hmasa a ni dawn tih deputy head Rostyslav Sharma chuan a sawi. Russia nena an indo hma, kum 2021 khan Ukraine-in a thil thawn chhuah aṭanga a sum hmuh hmun thuma ṭhena hmun khat chu iron and steel sector aṭanga lut a ni a, he sector hnuaiah hian hnathawk mi nuai ruk chuang an awm.

World Bank chuan indona tuar mektu, Ukraine ram tundin lehna tur hian USD tld 411 zet a ṭul dawnin a chhut a, hei hi an ram GDP aiin a let thumin a tam zawk. Kum 2022, February thlaa Russia-in Ukraine a run hnuah khan, ram pawn lam aṭangin Ukraine ṭanpuina sum hi USD tld 59 vel a lut tawh.