Israel mi 4 kah hlum an nih hnuah West Bank-ah Israel sipai dah belh

Palestinian mi pahnihin West Bank-a khawsa, Israel mi pali an kah hlum hnuah, Israel chuan West Bank-ah sipai a dah luh belh.

Thawhlehni khan West Bank hmar lam, Eli bulah silai keng Palestinian mi pahnih chuan gas station pawna Israel mi awmte chu pawng kahin mi pali an kap hlum a, mi dang pahnih an kap hliam bawk. Pawikhawihtu zinga pakhat hi civil mi pakhat chuan kap hlum ve nghalin, pakhat hi motor-in a tlanchhia a, mahse, Israel sipaite'n umzuiin an kap hlum ve leh bawk. Israel mi beitute hi Nablus bul, Urif khaw mi ve ve Mohannad Faleh Shhadeh (26) leh Khaled Mostafa Sbah (24) te an ni.

Israel mi pali kah hlum an nih vang hian Israel defence minister Yoav Galland chuan army chief leh security official-te chu meeting a neihpui nghal a, chhan let dan turte an sawiho.

Nilaini khan West Bank-ah hian Israel sipai dah belh an ni a, Prime Minister Benjamin Netanyahu chuan Palestinian-te pawikhawihna chhan letna ni pah fawmin, Palestinian ram an luahah hian Juda-te chenna tur, in 1,000 sak thar a ni dawn tih a puang bawk.

PM Netanyahu chuan Thawhlehnia Israel mi pali kah hlumna hmun, Eli bialah in 1,000 hi sak belh a ni dawn tih a sawi. "Firfiaka chetna chu na taka beih let a, kan ram tihchak hi kan chhan letna a ni," a ti.

West Bank-a Israel sipai dah luh belh a nih hnuah, Nilaini zan khan drone hmangin West Bank-a Palestinian firfiakte an kap. Israel Defence Force (IDF) leh Shin bet (Israel Security Agency) chuan thuchhuah siamin, an mi beihte hi tun hnaia Israel ram hmun hrang hrang beitute an ni tiin, kum 2006 hnuah West Bank-a firfiakte beihna atana drone an hman lehna hmasa ber a ni tih IDF thupuangtu chuan a sawi bawk.

Nimin khan Isarel sipaite chuan nikuma Israel sipai thattu nia sawi, Palestinian mi pakhat chenna in chu an tihchhiatsak bawk. He in neitu, Kamal Jouri hi nikum October thlaa West Bank hmar lama Israel sipai, SSgt. Ido Baruch beitu mi pahnih zinga pakhat a ni. An pahnih hian February thla khan man an ni tawh a, a thurualpui chenna in hi tun thla tir lam khan Israel sipaite chuan an lo tihchhiatsak tawh bawk.