US-in Ukraine chhawmdawlna tur USD tld 1.3 pe leh dawn

United States (US) chuan Ukraine economy siam ṭhatna turin chhawmdawlna, USD tlukdingawn 1.3 a pe dawn tih a puang leh.

US secrtary of state Antony Blinken chuan Nilaini khan Ukraine ṭanpuina pek thar leh tur hi a puang a, "Russia-in thil tam tak a tihchhiat chhunzawm zel avangin, Ukraine ram indin tharna turin kan pui dawn a, ram an indin thar leh dawn a ni," a ti.

Russia chuan Ukraine ramah chhiatna nasa tak a thlen a, a chhiatna thlen man hi a la pe ngei dawn tiin Blinken chuan a sawi zui bawk.

Ukraine ṭanpuina an pek tur hi US Congress-in a lo pawm tawh a ni. Kum 2022 February thlaa Russia-in Ukraine a run hnuah, US hian Ukraine ṭanpuina turin USD tld 63 hu a lo pe tawh a ni. Heng zingah hian USD tld 40 chu ralthuam leh security lam puihna hmanrua a pe.

Chhawmdawlna a pek thar leh tur zingah hian USD mtd 657 chu Ukraine rail line, port, border crossing leh infrastructure dang siam ṭhat leh tihchangtlunna atan hman a ni ang. USD mtd 20 chu Russia-in a tihchhiat sak, energy grid siam ṭhatna atan hmangin, market reform-na atan hman a ni bawk ang. A dangte chu custom service atan hman an ni dawn a ni.